The Charge Nurse

Dear insansapinas,

Where have you been Part 17.

(A story of friendship-this is my tuesday with morrie experience)
Ang kaibahan ng ating mga nurses sa ibang lahi particularly yong tapos dito ay BSN degreeholder and ating mga RN. Ibig sabihin, may General Education components ang kanilang nursing degree. Dito ay pwedeng kumuha lang ng mga subjects relevant sa nursing tapos "challenge " ang Board meaning kukuha ng licensure exam pagkatapos mag submit ng mga papel tungkol sa kanilang hands- on experience.


Walang masama. Ang masama ay kulang sila sa mga subjects na ginagawa silang tao. May passion sa trabaho, may simpatiya sa mga pasyente at may kunsensiya. Hindi lahat ang aking tinutukoy.


Patay na ang CN na nasa istorya. Sabagay  (SLN)  halos lahat  na ang mga head nurses  doon sa facility na yon. Yong pinakamataas, namatay sa cancer. Sobrang manigarilyo. Yong CN, cancer din ang ikinamatay. At iyong pinakaterror pero mabait sa akin ay namatay na rin yata. Matanda na siya noong nandoon siya.


Ang Charge Nurse na yon sa umaga ay parang walang pakiramdam. Walang awa sa mga pasyente. Parang mekanikal lang siyang nagtatrabaho. Wala akong pakialam sana sa kaniya.


Sabi ko nga kung sana, pinag-aaralan nila o nag--obserba sila, o kaya ay hindi nila tinatrato ang mga residente-pasyente na parang mga wala ng utak o walang pakiramdam hindi siya dadaan sa radar ko.


Isang araw, nasa activity room si The Doctor. Ganoon doon. May mga entertainment na ginagawa para ma-stimulate ang mga residente-pasyente. Wala si Misis. Nasa India yata.


May late na ipinasok na residente-pasyente sa activity room. Gusto noong nurse nito ay short cut kaya ginalaw niya ang upuan ng doctor nang walang pasintabi para makaraan yong wheel chair. Nagalit si  the Doc. Kasi kabastusan nga naman yon. Isa pa kung gusto nilang galawin, dapat, nagpaalam muna sila sa matanda. Respect ang wala. 

Dinala ko ang kaso sa Charge Nurse. Walang ginawa.


Nang tanghali, naghunger strike si Doc sa ginawa sa kaniya. 


Kahit na anong ibigay mo ayaw kainin hanggang hindi raw nag-aapologize ang nurse. Ipinagtanggol ni CN na may karapatan daw galawin ang The Doctor. Sabi ko hindi yong paggalaw ang issue. Ang issue ay ginalaw lang siya nang walang pasintabi. Mano bang nagbeep beep man lang.


Galit na galit si CN sa akin. Insubordination daw yong sa akin. Paano insubordination yon, hindi naman ako nursing staff ng facility. Hindi naman ako under niya. Sabi niya yong mga nurses daw namin hindi naman kasing taray ko. "Tural, sa aking responsibilidad  yon pumapatak." Ayaw noong mga nurses namin na kalabanin sila dahil dapat cooperative sila sa mga nursing staff kung gusto nilang madali ang trabaho nila.


Nagpabili rin ako ng sandwich para sa doctor. Tuloy ang hunger strike niya.


Report ako sa aking boss. Kinausap niya ang pinakamataas. Patawag si CN. Pagbalik ni CN, humingi siya ng dispensa para doon sa nurse. Tapos matalim na tingin ang ibinigay sa akin. Isa na namang kalaban ni Darna.


Sabi naman ng isang Pinay na nurse, inispoiled daw ng CN  ang mga nurses niya dahil pag sinabotahe siya nang mga yon, magko-call-in sick sabay-sabay ang mga floor nurses wala siyang support.


Hindi niya inexpect na may matino pang isip ang doctor at alam niya ang mali at hindi. Hindi kagaya ng mga ibang residente -pasyente doon na walang magawa dahil wala silang pamilyang nagmamalasakit.


Merong isang matanda na muntik nang mamatay sa taas ng lagnat. Yon pala, nagalit yong isang staff nurse at hinila yong kaniyang kamay nang ayaw lumabas sa kuwarto.


Nadislocate ang shoulder bone ng matanda at nagkalagnat. Hindi alam ng resident doctor bakit hindi maalis ang lagnat.
Buti na lang nagconfide yong matanda sa isang Pinay na nurse. Itim ang gumawa noon sa kaniya. Notorious sa rough handling ng mga pasyente. 


Pag nakikita siya ni doctor ay nanalisik ang mata nito at pinalalabas sa kuwarto kahit hindi pa siya hinahawakan. Nagkaenkwentro siguro sila ng doctor habang partner ito ng nurse namin sa gabi. Ang private nurse ay dagdag lang doon. Ang talagang assigned sa mga residente-pasyente ay ang mga staff nurse.

Tapos nang kumain ang doctor nang dumating si JB. May dalang steak. Rare daw.


Sabi ko," Are you sure it is not going to moo when you cut it with the steak knife? "

Pinandilatan ako. Ikalawa na siya nang araw na iyon na nandilat sa akin. 


Pumasok ako sa bathroom. Tumingin ako sa salamin. Pinadilatan ko rin ang sarili ko. Ayan di tatlo na.


Pinaysaamerika